Bydd Bwrdd y Cwmni’n cwrdd o leiaf unwaith bob tymor ysgol i oruchwylio gwaith y consortiwm.

Mae aelodaeth y Bwrdd yn cynnwys pum Uwch-aelod Cabinet sy’n cynrychioli’r pum Awdurdod Lleol (nad ydynt yn ddeiliaid y portffolio dros Addysg), Prif Weithredwr Arweiniol, Cyfarwyddwr Arweiniol, Rheolwr-gyfarwyddwr y GCA, hyd at 4 aelod anweithredol a fydd yn cael eu penodi, gyda chymeradwyaeth y Bwrdd, am eu harbenigedd mewn addysg, arweinyddiaeth a llywodraethu corfforaethol, ac arsylwr o Lywodraeth Cymru.

Bydd gan aelodau’r bwrdd gyfrifoldeb dros gymeradwyo’r gyllideb (gan gynnwys taliadau), cynllunio busnes a rheoli perfformiad y consortiwm rhanbarthol.

Bydd y Bwrdd hefyd yn darparu lefel briodol o her i’r GCA. Bydd hyn yn cynnwys cynllunio strategol, monitro a gwerthuso ac arweinyddiaeth a rheolaeth y gwasanaeth.